संघीयताको अभ्यास भईरहेको छ : मन्त्री चुमान

दमौली । गण्डकी प्रदेशका आन्तरिक मामिला तथा योजना मन्त्री हरिबहादुर चुमानले देशमा स्थानीय, प्रदेश र केन्द्र गरि तीन तहमा नै संघीयताको अभ्यास भईरहेको बताएका छन् ।

आन्तरिक मामिला तथा कानून मन्त्रालयको समन्वय तथा गण्डकी प्रदेश ट्राफिक प्रहरी कार्यालय गगनगौडा कास्कीको आयोजनामा आयोजित ट्राफिक व्यवस्थापन सुधार कार्यक्रमको दमौलीमा समुद्घाटन गर्दै मन्त्री चुमानले यस्तो बताएका हुन् ।

मन्त्री चुमानले सहकारीको माध्यमबाट संघीयताको संरक्षणमा जुट्नुपर्ने समय आएको बताउदै संघीयतालाई सफल बनाउन लाग्नुपर्ने बताए ।
‘ट्राफिक नियमको पालना गरौ, दुर्घटनाबाट बचौ र बचाउँ’ भन्ने मूल उद्देश्यका साथ आइतबार देखि दमौलीमा दुई पांग्रे सवारी साधानका चालकहरुका लागि एक हप्ते सडक प्रशिक्षण कार्यक्रम शुरु भएको छ ।

सडक संरचना जुन किसिमले गर्नुपर्ने हो सो अनुरुप हुन नसक्दा सवारी दुर्घटनामा बृद्धि हुदै गएको छ । उनले भने ‘साँघुरो सडकलाई फराकिलो बनाउँदै सडक दुर्घटना न्यूनिकरण गर्न प्रदेश सरकारबाट पहलकदमी भैरहेको छ ।’

अज्ञानताका कारण हुने दुर्घटना बाहेक लागुऔषध,मदिराजन्य सेवन गरी सवारी चलाउँदा बढी मात्रामा सवारी दुर्घटना हुने गरेकोले न्यूनिकरणका लागि निगरानी बढाउनुपर्नेमा उनले जोड दिए ।

व्यासनगरपालिकाका नगरप्रमुख बैकुण्ठ न्यौपानेले सवारी अनुमति प्रमाणपत्र लिने कार्य कठिनाई र जटिलता भएका कारण यत्तिकै सवारी चलाउने क्रम बढेकोले दुर्घटनामा पनि बृद्धि हुने गरेको उनले बताउनुभयो ।

सवारी अनुमति प्रमाणपत्र लिन सहज वातावरण बनाउनुपर्ने तर्फ ईगित गर्दै कतिपय गलत धन्दाबाट पनि सवारी अनुमति प्रमाणपत्र वितरण गरिएकोले त्यसले दुर्घटना निम्त्याउने गरेको छ । उनले भने ।

कार्यक्रममा प्रमुख जिल्ला अधिकारी सागर आचार्यले सवारी दुर्घटना न्यूनिकरणको लागि सडकमै चालकलाई प्रशिक्षण दिने कार्य प्रभावकारी हुने बताए ।

गण्डकी प्रदेशका ट्राफिक प्रमुख प्रभु प्रसाद ढकालले गण्डकी प्रदेशका एघार वटै जिल्लाहरुमा यस किसिमको कार्यक्रम संञ्चालन गरिने बताए । चालकहरुलाई प्रशिक्षण मात्रै नदिई असल सवारी चालकलाई पुरस्कृत गर्दै प्रोत्साहन गर्ने योजना समेत रहेको उनले बताए ।
कार्यक्रममा तनहुँ उद्योग वाणिज्य संघका अध्यक्ष मानकाजी श्रेष्ठ, जिल्ला ट्राफिक कार्यालय तनहुँका प्रमुख सई रेशम रानाभाट लगायतका वक्ताहरुले सवारी दुर्घटना न्यूनिकरणका लागि सम्बन्ध निकाय सबैले चासो दिनुपर्नेमा जोड दिएका थिए ।

बढीमा पन्ध्र सवारी : प्रशिक्षणमा खटिने ट्राफिकले दिनमा बढीमा पन्ध्र सवारी जम्मा गर्नेछ । यसरी जम्मा गरिएका मोटरसाइकल र स्कुटर दुर्घटनाबाट बच्ने उपायका बारेमा प्रशिक्षण दिइने जिल्ला इन्चार्ज रानाभाटले बताए । कम्तिमा डेढ घण्टाको प्रशिक्षण संञ्चालन गरिने बताइएको छ ।

Leave a Reply

Your email address will not be published. Required fields are marked *

Back to top button